ساچلارينا بنزتميشم گئجه مي
گل اوزاق گزمه يانيما سئوگيليم
دوداغيندا ايتيرميشم سؤزومو
گولوشونله جانيمي آل سئوگيليم
...
سن او تايدا من بو تايدا آرالي
كؤنلوم درد اليندن اولوب يارالي
يانيما گل آذربايجان مارالي
گولوشونله جانيمي آل سئوگيليم
كؤنلومده بو حسرت منه درد اولور
اوره ييمدن آخيب گؤزومه دولور
وئردييين گوللرين اليمده سولور
گولوشونله جانيمي آل سئوگيليم
سن منيم چون يازيلماميش بير شعير
سطيرلر دينله نير سطيرلر دئيير
بو كلمه لر ماهني كؤينه يي گئيير
گولوشونله جانيمي آل سئوگيليم
بابكين شعرينده غم وار كدر وار
ووصالا چاتماغا مين بير تهر وار
هر گئجه سونوندا يقين سحر وار
گولوشونله جانيمي آل سئوگيليم
